روئیے مت میاں سمجھتے ہیں

روئیے مت میاں سمجھتے ہیں

ساری مجبوریاں سمجھتے ہیں

سب جنہیں بے زباں سمجھتے تھے

پیار کی وہ زباں سمجھتے ہیں

ہم تو بچپن سے ایک دوجے کی

خوبیاں خامیاں سمجھتے ہیں

کیا محبت کے معنی سمجھائیں

آج کے نوجواں سمجھتے ہیں

ہم تو دھرتی پہ جان دیتے ہیں

ہم تو دھرتی کو ماں سمجھتے ہیں

خوب واقف ہیں اپنے بچوں سے

باغ کو باغباں سمجھتے ہیں

کتنا سادہ مزاج ہے ان کا

ہاں کا مطلب بھی ہاں سمجھتے ہیں

کیا محبت ہے جانتے ہیں فیضؔ

ہم کہ اٹھکھیلیاں سمجھتے ہیں