rok de usko bhala kis ki majal aata hai

rok de us ko bhalā kis kī majāl aatā hai

har taraqqī ke ta.āqub meñ zavāl aatā hai

larza-añgez sahī tamkanat-e-taḳht-e-shahī

lek jab arsh-e-mua.allā ko jalāl aatā hai

ek dil pyaar bharā sab ke liye laayā huuñ

na mujhe aur koī fan na kamāl aatā hai

maiñ ne murshid se duā chāhī to hañs kar ye kahā

pyaar ghar chhoḌ ke jaatā hai jo maal aatā hai

jab ye uftād paḌī mujh pe samajh meñ aayā

ek shīshe kī tarah dil meñ bhī baal aatā hai

naag kā zahr bhī shīrīñ hai zarā yaad rahe

sar-e-mimbar koī nau-shīnā maqāl aatā hai

dekhte jā.iye sāme.a nazar aane ke nahīñ

anjuman meñ vo koī ḳhair-sagāl aatā hai

sitam ījād na kar ai sitam-ījād bahut

tere sar kitnī hī nasloñ kā vabāl aatā hai

donoñ paidā to khanaktī huī miTTī se hue

taal par tum ko mujhe qaal pe haal aatā hai

dil to phir dil hai miyāñ zehn bhī qaabū meñ kahāñ

jis ko chāho ki na aa.e vo ḳhayāl aatā hai

ab to panghaT kī vo doshīza talāsho jis ko

na bhar aatā hai na mashkīza sambhāl aatā hai

ik majānīn kī duniyā hai ye jādū-nagrī

bas ye dekho ki kise sehr-e-halāl aatā hai

ḳhud-farebī to haiñ mushtāq ki is dast meñ kab

āsmāñ rañg-e-fusūñ-sāz-e-shaġhāl aatā hai

muntazir baiThe haiñ ham bhī ki pa.e dād-e-ġhazal

zaiġham aatā hai koī koī ġhazāl aatā hai

hañsne vaale kahīñ kuchh soch ke rone na lageñ

bazm meñ 'kausar'-e-āshufta-ḳhayāl aatā hai

rok de us ko bhala kis ki majal aata hai

har taraqqi ke taaqub mein zawal aata hai

larza-angez sahi tamkanat-e-taKHt-e-shahi

lek jab arsh-e-mualla ko jalal aata hai

ek dil pyar bhara sab ke liye laya hun

na mujhe aur koi fan na kamal aata hai

main ne murshid se dua chahi to hans kar ye kaha

pyar ghar chhoD ke jata hai jo mal aata hai

jab ye uftad paDi mujh pe samajh mein aaya

ek shishe ki tarah dil mein bhi baal aata hai

nag ka zahr bhi shirin hai zara yaad rahe

sar-e-mimbar koi nau-shina maqal aata hai

dekhte jaiye samea nazar aane ke nahin

anjuman mein wo koi KHair-sagal aata hai

sitam ijad na kar ai sitam-ijad bahut

tere sar kitni hi naslon ka wabaal aata hai

donon paida to khanakti hui miTTi se hue

tal par tum ko mujhe qal pe haal aata hai

dil to phir dil hai miyan zehn bhi qabu mein kahan

jis ko chaho ki na aae wo KHayal aata hai

ab to panghaT ki wo doshiza talasho jis ko

na bhar aata hai na mashkiza sambhaal aata hai

ek majaanin ki duniya hai ye jadu-nagri

bas ye dekho ki kise sehr-e-halal aata hai

KHud-farebi to hain mushtaq ki is dast mein kab

aasman rang-e-fusun-saz-e-shaghaal aata hai

muntazir baiThe hain hum bhi ki pae dad-e-ghazal

zaigham aata hai koi koi ghazal aata hai

hansne wale kahin kuchh soch ke rone na lagen

bazm mein 'kausar'-e-ashufta-KHayal aata hai