rok rakkha tha jo in aankhon mein khaara pani

rok rakkhā thā jo in āñkhoñ meñ khārā paanī

merī dīvāroñ meñ dar aayā vo saarā paanī

ek dariyā ko dikhā.ī thī kabhī pyaas apnī

phir nahīñ māñgā kabhī maiñ ne dobārā paanī

apnī āñkhoñ se nichoḌūñgā kisī roz use

kartā rahtā hai bahut mujh se kinārā paanī

ab ke bārish pe koī haq nahīñ insānoñ kā

ab ke chiḌiyoñ ke liye rab ne utārā paanī

maiñ samundar se lagī shor-zamīñ jaisā huuñ

mārtā rahtā hai mujh ko mirā khārā paanī

maiñ ne in āñkhoñ se kuchh motī chune the 'at.har'

mere hoñToñ meñ abhī jazb hai khārā paanī

rok rakkha tha jo in aankhon mein khaara pani

meri diwaron mein dar aaya wo sara pani

ek dariya ko dikhai thi kabhi pyas apni

phir nahin manga kabhi main ne dobara pani

apni aankhon se nichoDunga kisi roz use

karta rahta hai bahut mujh se kinara pani

ab ke barish pe koi haq nahin insanon ka

ab ke chiDiyon ke liye rab ne utara pani

main samundar se lagi shor-zamin jaisa hun

marta rahta hai mujh ko mera khaara pani

main ne in aankhon se kuchh moti chune the 'athar'

mere honTon mein abhi jazb hai khaara pani