rone mein abr-e-tar ki tarah chashm ko mere josh hai

rone meñ abr-e-tar kī tarah chashm ko mere josh hai

naala meñ aah ra.ad sā shor hai aur ḳharosh hai

ra.ad ne shor se pukār mastoñ ko ye naved dī

tum ho kidhar ai mai-kasho mausam nā.e-o-nosh hai

chaak karūñ huuñ jeb-e-sabr tāle-e-andalīb dekh

sunñe ko us kā dard-e-dil gul hī ba-shakl-e-gosh hai

kin ne chaman meñ mai-kashī kī hai sabā tū sach kaho

jaam hai gul ke haath meñ ġhuncha subū ba-dosh hai

kaun divāna mar gayā us ke azā meñ ab talak

us ke libās sar-ba-sar chashm siyāh-posh hai

naala hai ḳhāna-zād-e-ishq lek kahāñ sar-o-dimāġh

apne to qāfile ke biich jo hai jaras ḳhamosh hai

rone mein abr-e-tar ki tarah chashm ko mere josh hai

nala mein aah rad sa shor hai aur KHarosh hai

rad ne shor se pukar maston ko ye nawed di

tum ho kidhar ai mai-kasho mausam nae-o-nosh hai

chaak karun hun jeb-e-sabr tale-e-andalib dekh

sunne ko us ka dard-e-dil gul hi ba-shakl-e-gosh hai

kin ne chaman mein mai-kashi ki hai saba tu sach kaho

jam hai gul ke hath mein ghuncha subu ba-dosh hai

kaun diwana mar gaya us ke aza mein ab talak

us ke libas sar-ba-sar chashm siyah-posh hai

nala hai KHana-zad-e-ishq lek kahan sar-o-dimagh

apne to qafile ke bich jo hai jaras KHamosh hai