rote hain dekh dekh ke dil ko jigar ko hum

rote haiñ dekh dekh ke dil ko jigar ko ham

ai dost kyā kaheñ tere tīr-e-nazar ko ham

aayā kabhī na rahm kisī ḳhasta-hāl par

dete haiñ daad us but-e-bedād-gar ko ham

naale dil-e-hazīñ ke na jā.eñge be-asar

ab be-ḳhabar na pā.eñge us be-ḳhabar ko ham

kahte haiñ log sab ki ye barchhī hai teġh hai

rakkheñge ab nazar meñ tumhārī nazar ko ham

sab kuchh vo jāntā hai use kyā ḳhabar nahīñ

kyūñkar sunā.eñ haal kisī bā-ḳhabar ko ham

hāthoñ meñ jaam hai na surāhī pe dastaras

kyā muñh dikhā.eñ gardish-e-shām-o-sahar ko ham

dil meñ basā ke ik but-e-bedād-gar kī yaad

barbād kar rahe haiñ is ābād ghar ko ham

barq-e-nigāh-e-nāz se bachnā muhāl hai

kab tak chhupā.e rakkheñge qalb-o-jigar ko ham

dām-e-fareb-e-husn hai rahbar har ik taraf

le jaa.eñ ab kahāñ dil-e-vahshat-asar ko ham

rote hain dekh dekh ke dil ko jigar ko hum

ai dost kya kahen tere tir-e-nazar ko hum

aaya kabhi na rahm kisi KHasta-haal par

dete hain dad us but-e-bedad-gar ko hum

nale dil-e-hazin ke na jaenge be-asar

ab be-KHabar na paenge us be-KHabar ko hum

kahte hain log sab ki ye barchhi hai tegh hai

rakkhenge ab nazar mein tumhaari nazar ko hum

sab kuchh wo jaanta hai use kya KHabar nahin

kyunkar sunaen haal kisi ba-KHabar ko hum

hathon mein jam hai na surahi pe dastaras

kya munh dikhaen gardish-e-sham-o-sahar ko hum

dil mein basa ke ek but-e-bedad-gar ki yaad

barbaad kar rahe hain is aabaad ghar ko hum

barq-e-nigah-e-naz se bachna muhaal hai

kab tak chhupae rakkhenge qalb-o-jigar ko hum

dam-e-fareb-e-husn hai rahbar har ek taraf

le jaen ab kahan dil-e-wahshat-asar ko hum