roun to KHushk aankh mein aansu kahan se aae

ro.uuñ to ḳhushk aañkh meñ aañsū kahāñ se aa.e

bolūñ to bhī zabān pe qaabū kahāñ se aa.e

bahno tumhārī maañg kā siñdūr kyā huā

bachchoñ tumhāre haath meñ chāqū kahāñ se aa.e

insāf kā lihāz na taqsīm kā shu.ūr

in bandaroñ ke haath tarāzū kahāñ se aa.e

vo ehtirām-e-masjid-o-mandir kahāñ ga.e

ye sādhūoñ ke bhes meñ Daaku kahāñ se aa.e

haiñ ek ghar ke log yahāñ ġhair kaun hai

phir ye muāmalāt-e-man-o-tū kahāñ se aa.e

aapas kī ranjisheñ haiñ ki bāhar kī sāzisheñ

ye zid ye iḳhtilāf ke pahlū kahāñ se aa.e

allāh kaise aa ga.ī lafzoñ meñ raushnī

merī bayāz-e-sher meñ jugnū kahāñ se aa.e

roun to KHushk aankh mein aansu kahan se aae

bolun to bhi zaban pe qabu kahan se aae

bahno tumhaari mang ka sindur kya hua

bachchon tumhaare hath mein chaqu kahan se aae

insaf ka lihaz na taqsim ka shuur

in bandaron ke hath taraazu kahan se aae

wo ehtiram-e-masjid-o-mandir kahan gae

ye sadhuon ke bhes mein Daku kahan se aae

hain ek ghar ke log yahan ghair kaun hai

phir ye muamalat-e-man-o-tu kahan se aae

aapas ki ranjishen hain ki bahar ki sazishen

ye zid ye iKHtilaf ke pahlu kahan se aae

allah kaise aa gai lafzon mein raushni

meri bayaz-e-sher mein jugnu kahan se aae