roz aKHbar mein qismat ka likha paDh paDh kar

roz aḳhbār meñ qismat kā likhā paḌh paḌh kar

log ab ghar se nikalte haiñ du'ā paḌh paḌh kar

dekh kar tujh ko ye ehsās huā hai mujh ko

qismateñ likhtā hai chehroñ ko ḳhudā paḌh paḌh kar

kaise aaseb ne is shahr ko aa gherā hai

log dete haiñ davā.eñ bhī du'ā paḌh paḌh kar

ham vo tahrīr jise likkhā tire hāthoñ ne

mat hameñ chhoḌ tū apne se judā paḌh paḌh kar

bas ga.ī is meñ ye kis paak badan kī ḳhushbū

aatī hai bād-e-sabā sall-e-'alā paḌh paḌh kar

ham ne haq ke liye jaañ dene kā fan sīkhā hai

qissa-e-mā'raka-e-karb-o-balā paḌh paḌh kar

tujh ko bhī hijr kī tahrīr satātī hogī

maiñ bhī bechain huuñ yādoñ kā likhā paḌh paḌh kar

aaj ke daur ke saffāk chalan vaale ham

dang haiñ tazkira-e-mehr-o-vafā paḌh paḌh kar

dil bhī khiñchtā hai gunāhoñ kī taraf 'ābid' kā

Dar bhī lagtā hai gunāhoñ kī sazā paḌh paḌh kar

roz aKHbar mein qismat ka likha paDh paDh kar

log ab ghar se nikalte hain du'a paDh paDh kar

dekh kar tujh ko ye ehsas hua hai mujh ko

qismaten likhta hai chehron ko KHuda paDh paDh kar

kaise aaseb ne is shahr ko aa ghera hai

log dete hain dawaen bhi du'a paDh paDh kar

hum wo tahrir jise likkha tere hathon ne

mat hamein chhoD tu apne se juda paDh paDh kar

bas gai is mein ye kis pak badan ki KHushbu

aati hai baad-e-saba sall-e-'ala paDh paDh kar

hum ne haq ke liye jaan dene ka fan sikha hai

qissa-e-ma'raka-e-karb-o-bala paDh paDh kar

tujh ko bhi hijr ki tahrir satati hogi

main bhi bechain hun yaadon ka likha paDh paDh kar

aaj ke daur ke saffak chalan wale hum

dang hain tazkira-e-mehr-o-wafa paDh paDh kar

dil bhi khinchta hai gunahon ki taraf 'abid' ka

Dar bhi lagta hai gunahon ki saza paDh paDh kar