roz be-waqt yahan kaun sada deta hai

roz be-vaqt yahāñ kaun sadā detā hai

niiñd puurī nahīñ hotī ki jagā detā hai

saarā apnā hī likhā aap miTā Daalā thā

yaad aatā hai vo qissa to rulā detā hai

hone lagtā hai gumāñ jumbish-e-lab kā jis dam

sāmne se koī tasvīr haTā detā hai

chalo ab Duub hī jaate haiñ ki dariyā kab se

kisī ġharqāb ḳhazāne kā pata detā hai

roz miltā huuñ maiñ apne ko baḌī mushkil se

kaun hai jo mujhe ḳhud se hī chhupā detā hai

jaane kis dhuup kī shiddat hai badan-sahrā meñ

lū kā jhoñkā bhī qayāmat kā maza detā hai

sāya-e-abr-e-ravāñ terā guzarnā aksar

kuchh na kuchh jaise hameñ yaad dilātā detā hai

roz be-waqt yahan kaun sada deta hai

nind puri nahin hoti ki jaga deta hai

sara apna hi likha aap miTa Dala tha

yaad aata hai wo qissa to rula deta hai

hone lagta hai guman jumbish-e-lab ka jis dam

samne se koi taswir haTa deta hai

chalo ab Dub hi jate hain ki dariya kab se

kisi gharqab KHazane ka pata deta hai

roz milta hun main apne ko baDi mushkil se

kaun hai jo mujhe KHud se hi chhupa deta hai

jaane kis dhup ki shiddat hai badan-sahra mein

lu ka jhonka bhi qayamat ka maza deta hai

saya-e-abr-e-rawan tera guzarna aksar

kuchh na kuchh jaise hamein yaad dilata deta hai