roz dil ko mere ek zaKHm naya dete hain

roz dil ko mire ik zaḳhm nayā dete haiñ

aap kyā apnā banāne kī sazā dete haiñ

merī betābī-e-dil kā jo uḌāte haiñ mazāq

vo bhaḌakte hue sho.aloñ ko havā dete haiñ

log kahte haiñ jise zarf vo apnā hai mizāj

apne dushman se bhī ham pyaar jatā dete haiñ

koī āvāz nahīñ hotī bhare bartan se

aur ḳhālī hoñ to har gaam sadā dete haiñ

dekh kar mere nasheman se dhuāñ uThtā huā

sūkhe patte bhī daraḳhtoñ ke havā dete haiñ

zaḳhm-e-dil chāñd kī mānind chamakte haiñ mire

aap jab bhūlī huī baat sunā dete haiñ

aap chup-chāp hī aate haiñ tasavvur meñ magar

mere ḳhvābīda ḳhayāloñ ko jagā dete haiñ

sirf ik devtā samjhā hai tumheñ maiñ ne magar

log patthar ko bhī bhagvān banā dete haiñ

kachchī dīvār kī mānind haiñ ham ai 'gauhar'

ek Thokar se jise log girā dete haiñ

roz dil ko mere ek zaKHm naya dete hain

aap kya apna banane ki saza dete hain

meri betabi-e-dil ka jo uDate hain mazaq

wo bhaDakte hue shoalon ko hawa dete hain

log kahte hain jise zarf wo apna hai mizaj

apne dushman se bhi hum pyar jata dete hain

koi aawaz nahin hoti bhare bartan se

aur KHali hon to har gam sada dete hain

dekh kar mere nasheman se dhuan uThta hua

sukhe patte bhi daraKHton ke hawa dete hain

zaKHm-e-dil chand ki manind chamakte hain mere

aap jab bhuli hui baat suna dete hain

aap chup-chap hi aate hain tasawwur mein magar

mere KHwabida KHayalon ko jaga dete hain

sirf ek dewta samjha hai tumhein main ne magar

log patthar ko bhi bhagwan bana dete hain

kachchi diwar ki manind hain hum ai 'gauhar'

ek Thokar se jise log gira dete hain