روز ازل سے واقف اسرار میں ہی تھا

روز ازل سے واقف اسرار میں ہی تھا

پاکیزگیٔ نفس کا معیار میں ہی تھا

آسائشیں تمام میسر تھیں خلد میں

دنیائے رنج و غم کا طلب گار میں ہی تھا

اہل خرد کو اس کا رہا عمر بھر ملال

اہل جنوں میں صاحب دستار میں ہی تھا

دنیا نے صلح کل کا پیامی کہا مگر

دو بھائیوں کے بیچ میں دیوار میں ہی تھا

سب لوگ میرے شہر میں آذر پرست تھے

ہاں بت گری کی رسم سے بیزار میں ہی تھا

تہذیب زندگانیٔ آدم کے واسطے

ظلمت کدے میں مطلع انوار میں ہی تھا

احباب کی نوازش پیہم سے یہ لگا

اس شہر میں اکیلا قلم کار میں ہی تھا

تسلیم کر چکا ہے زمانہ اسے ندیمؔ

منزل شناس قافلہ سالار میں ہی تھا