roz-e-azal se waqif-e-asrar main hi tha

roz-e-azal se vāqif-e-asrār maiñ hī thā

pākīzgī-e-nafs kā me.aar maiñ hī thā

āsā.isheñ tamām mayassar thiiñ ḳhuld meñ

duniyā-e-ranj-o-ġham kā talabgār maiñ hī thā

ahl-e-ḳhirad ko is kā rahā umr-bhar malāl

ahl-e-junūñ meñ sāhab-e-dastār maiñ hī thā

duniyā ne sulh-e-kul kā payāmī kahā magar

do bhā.iyoñ ke biich meñ dīvār maiñ hī thā

sab log mere shahr meñ āzar-parast the

haañ but-garī kī rasm se bezār maiñ hī thā

tahzīb-e-zindagānī-e-ādam ke vāste

zulmat-kade meñ matla-e-anvār maiñ hī thā

ahbāb kī navāzish-e-paiham se ye lagā

is shahr meñ akelā qalamkār maiñ hī thā

taslīm kar chukā hai zamāna ise 'nadīm'

manzil-shanās qāfila-sālār maiñ hī thā

roz-e-azal se waqif-e-asrar main hi tha

pakizgi-e-nafs ka mear main hi tha

aasaishen tamam mayassar thin KHuld mein

duniya-e-ranj-o-gham ka talabgar main hi tha

ahl-e-KHirad ko is ka raha umr-bhar malal

ahl-e-junun mein sahab-e-dastar main hi tha

duniya ne sulh-e-kul ka payami kaha magar

do bhaiyon ke bich mein diwar main hi tha

sab log mere shahr mein aazar-parast the

han but-gari ki rasm se bezar main hi tha

tahzib-e-zindagani-e-adam ke waste

zulmat-kade mein matla-e-anwar main hi tha

ahbab ki nawazish-e-paiham se ye laga

is shahr mein akela qalamkar main hi tha

taslim kar chuka hai zamana ise 'nadim'

manzil-shanas qafila-salar main hi tha