roz-e-firaq har taraf ek intishaar tha

roz-e-firāq har taraf ik intishār thā

maiñ be-qarār thā to jahāñ be-qarār thā

naqsh-e-tilism merā dil-e-dāġh-dār thā

thā din ko phuul raat ko sham-e-mazār thā

yādash-ba-ḳhair yaad haiñ dil kī musībateñ

pahlū meñ ik sitam-zada-e-rozgār thā

allāh re shām-e-ġham mire dil kī shikastagī

tāroñ kā TūTnā bhī mujhe nāgavār thā

vahshat-tarāz thī kashish-e-shām-e-be-kasī

marqad se apne duur charāġh-e-mazār thā

kyā dete ham kisī ko duā-e-salāmtī

apnī hī zindagī kā kise e'tibār thā

'sīmāb' naala kar ke pashemāniyāñ fuzūl

vo kaam kyuuñ kiyā jo unheñ nāgavār thā

roz-e-firaq har taraf ek intishaar tha

main be-qarar tha to jahan be-qarar tha

naqsh-e-tilism mera dil-e-dagh-dar tha

tha din ko phul raat ko sham-e-mazar tha

yaadash-ba-KHair yaad hain dil ki musibaten

pahlu mein ek sitam-zada-e-rozgar tha

allah re sham-e-gham mere dil ki shikastagi

taron ka TuTna bhi mujhe nagawar tha

wahshat-taraaz thi kashish-e-sham-e-be-kasi

marqad se apne dur charagh-e-mazar tha

kya dete hum kisi ko dua-e-salamti

apni hi zindagi ka kise e'tibar tha

'simab' nala kar ke pashemaniyan fuzul

wo kaam kyun kiya jo unhen nagawar tha