roz kahte the kabhi ghair ke ghar dekh liya

roz kahte the kabhī ġhair ke ghar dekh liyā

aaj to aañkh se ai rashk-e-qamar dekh liyā

kāba-e-dil se milī manzil-e-maqsūd kī raah

yaar kā ham ne usī kūche meñ ghar dekh liyā

jānib-e-ġhair ishāra jo huā jānte haiñ

ham ne ḳhud aañkh se dekhā ki idhar dekh liyā

kaun sotā hai kise hijr meñ niiñd aatī hai

ḳhvāb meñ kis ne tumheñ ek nazar dekh liyā

jab kahā maiñ ne nahīñ koī chalo mere ghar

ḳhuub raste meñ idhar aur udhar dekh liyā

bole chalne meñ nahīñ uzr mujhe kuchh lekin

ḳhauf ye hai kisī mufsid ne agar dekh liyā

aahoñ se aag lagā deñge dil-e-dushman meñ

chhup ke rahte haiñ jahāñ aap kā ghar dekh liyā

bach gayā naqd-e-dil ab ke to nazar se us kī

aa.egā phir bhī agar chor ne ghar dekh liyā

roz kahte the kabhi ghair ke ghar dekh liya

aaj to aankh se ai rashk-e-qamar dekh liya

kaba-e-dil se mili manzil-e-maqsud ki rah

yar ka hum ne usi kuche mein ghar dekh liya

jaanib-e-ghair ishaara jo hua jaante hain

hum ne KHud aankh se dekha ki idhar dekh liya

kaun sota hai kise hijr mein nind aati hai

KHwab mein kis ne tumhein ek nazar dekh liya

jab kaha main ne nahin koi chalo mere ghar

KHub raste mein idhar aur udhar dekh liya

bole chalne mein nahin uzr mujhe kuchh lekin

KHauf ye hai kisi mufsid ne agar dekh liya

aahon se aag laga denge dil-e-dushman mein

chhup ke rahte hain jahan aap ka ghar dekh liya

bach gaya naqd-e-dil ab ke to nazar se us ki

aaega phir bhi agar chor ne ghar dekh liya