roz nezon pe tamannaon ke sar aate hain

roz nezoñ pe tamannāoñ ke sar aate haiñ

ab mirī fat.h ke āsār nazar aate haiñ

yaad kā sang-e-girāñ ruuh kī gahrā.ī meñ

Dūbtā hai to ka.ī zaḳhm ubhar aate haiñ

dil se majbūr bhī ham sāhib-e-pindār bhī ham

āstāñ se tire katrā ke guzar aate haiñ

vo tirā dard sahī vaqt ke hāthoñ ko magar

thapkiyāñ de ke sulāne ke hunar aate haiñ

zindagī kartī nahīñ TūTte rishtoñ se vafā

saare ilzām magar maut ke sar aate haiñ

dil meñ mat DhūñD ki ai tālib-e-īsār-o-vafā

ab ye alfāz kitāboñ meñ nazar aate haiñ

saare din karte haiñ ham dasht-e-tamannā kā safar

gard chehre pe liye shaam ko ghar aate haiñ

'shān' ab ham ko to aksar shab-e-tanhā.ī meñ

niiñd aatī nahīñ aur ḳhvāb nazar aate haiñ

roz nezon pe tamannaon ke sar aate hain

ab meri fath ke aasar nazar aate hain

yaad ka sang-e-giran ruh ki gahrai mein

Dubta hai to kai zaKHm ubhar aate hain

dil se majbur bhi hum sahib-e-pindar bhi hum

aastan se tere katra ke guzar aate hain

wo tera dard sahi waqt ke hathon ko magar

thapkiyan de ke sulane ke hunar aate hain

zindagi karti nahin TuTte rishton se wafa

sare ilzam magar maut ke sar aate hain

dil mein mat DhunD ki ai talib-e-isar-o-wafa

ab ye alfaz kitabon mein nazar aate hain

sare din karte hain hum dasht-e-tamanna ka safar

gard chehre pe liye sham ko ghar aate hain

'shan' ab hum ko to aksar shab-e-tanhai mein

nind aati nahin aur KHwab nazar aate hain