روز نیزوں پہ تمناؤں کے سر آتے ہیں

روز نیزوں پہ تمناؤں کے سر آتے ہیں

اب مری فتح کے آثار نظر آتے ہیں

یاد کا سنگ گراں روح کی گہرائی میں

ڈوبتا ہے تو کئی زخم ابھر آتے ہیں

دل سے مجبور بھی ہم صاحب پندار بھی ہم

آستاں سے ترے کترا کے گزر آتے ہیں

وہ ترا درد سہی وقت کے ہاتھوں کو مگر

تھپکیاں دے کے سلانے کے ہنر آتے ہیں

زندگی کرتی نہیں ٹوٹتے رشتوں سے وفا

سارے الزام مگر موت کے سر آتے ہیں

دل میں مت ڈھونڈ کہ اے طالب ایثار و وفا

اب یہ الفاظ کتابوں میں نظر آتے ہیں

سارے دن کرتے ہیں ہم دشت تمنا کا سفر

گرد چہرے پہ لیے شام کو گھر آتے ہیں

شانؔ اب ہم کو تو اکثر شب تنہائی میں

نیند آتی نہیں اور خواب نظر آتے ہیں