roz puchhe hai mere dil ka bayaban mujhse

roz pūchhe hai mire dil kā bayābāñ mujh se

jaane kyoñ ruuTh gayā jān-e-bahārāñ mujh se

maut us vaqt masīhā kī tarah lagtī hai

zindagī hotī hai jab dast-o-garebāñ mujh se

marte dam bhī na huī haa.e mayassar ḳhalvat

milne aa.e haiñ vo hamrāh-e-raqībāñ mujh se

dil kī har baat ko lafzoñ meñ bayāñ kartā huuñ

is liye rahte haiñ kuchh log pareshāñ mujh se

zindagī sarf kī duniyā kī talab meñ āḳhir

kuchh adā ho na sakā farz-e-musalmāñ mujh se

shab guzarte hī bujhā doge yaqīnan mujh ko

ro ke ye kahne lagī sham-e-shabistāñ mujh se

tishnagī se bhī mujhe kaif mayassar aatā

kaash mil jaatā koī abr-e-gurezāñ mujh se

tujh ko dekhā thā yahāñ khilte gulāboñ kī tarah

is liye chhuTtā nahīñ shahr-e-nigārāñ mujh se

maiñ qalam bech ke shāhoñ ke qasīde likhkhūñ

chāhte haiñ yahī shāhoñ ke sanā-ḳhvāñ mujh se

dekh kar baḌhte hue dard kī shiddat ko 'bilāl'

zaḳhm bhī hone lage ab to pashemāñ mujh se

roz puchhe hai mere dil ka bayaban mujh se

jaane kyon ruTh gaya jaan-e-bahaaran mujh se

maut us waqt masiha ki tarah lagti hai

zindagi hoti hai jab dast-o-gareban mujh se

marte dam bhi na hui hae mayassar KHalwat

milne aae hain wo hamrah-e-raqiban mujh se

dil ki har baat ko lafzon mein bayan karta hun

is liye rahte hain kuchh log pareshan mujh se

zindagi sarf ki duniya ki talab mein aaKHir

kuchh ada ho na saka farz-e-musalman mujh se

shab guzarte hi bujha doge yaqinan mujh ko

ro ke ye kahne lagi sham-e-shabistan mujh se

tishnagi se bhi mujhe kaif mayassar aata

kash mil jata koi abr-e-gurezan mujh se

tujh ko dekha tha yahan khilte gulabon ki tarah

is liye chhuTta nahin shahr-e-nigaran mujh se

main qalam bech ke shahon ke qaside likhkhun

chahte hain yahi shahon ke sana-KHwan mujh se

dekh kar baDhte hue dard ki shiddat ko 'bilal'

zaKHm bhi hone lage ab to pasheman mujh se