رک رک کے راستے میں شجر دیکھتا رہا

رک رک کے راستے میں شجر دیکھتا رہا

پہنچا جو اپنے گھر پہ تو گھر دیکھتا رہا

دن بھر تو کھیلتا رہا بچوں کے ساتھ پھر

پانی میں گھور گھور کے سر دیکھتا رہا

اس عرصۂ نگاہ میں اذن وفا کہاں

مدت تلک وہ میری نظر دیکھتا رہا

پھر اس نے اپنے چہرے سے آنکھیں اتار دیں

آنگن میں دل کے رقص شرر دیکھتا رہا

موجوں کے آر پار سفینہ تھا خواب کا

گہرے سمندروں سے سحر دیکھتا رہا

بکھرے ہوئے وہ رنگ وہ اڑتا ہوا جمال

زلفوں کو اس کی تا بہ کمر دیکھتا رہا

جھولی میں بھر کے لعل و گہر لوگ چل دئے

اجملؔ متاع حرف و ہنر دیکھتا رہا