ruKH badalte hichkichate the ki Dar aisa bhi tha

ruḳh badalte hichkichāte the ki Dar aisā bhī thā

ham havā ke saath chalte the magar aisā bhī thā

lauT aatī thiiñ ka.ī sābiq patoñ kī chiTThiyāñ

ghar badal dete the bāshinde magar aisā bhī thā

vo kisī kā bhī na thā lekin thā sab kā mo'tabar

koī kyā jaane ki us meñ ik hunar aisā bhī thā

paañv ā.inda kī jānib sar guzishta kī taraf

yuuñ bhī chalte the musāfir ik safar aisā bhī thā

taultā thā ik ko ik ashyā-e-masraf kī tarah

dostī thī aur andāz-e-nazar aisā bhī thā

ḳhud se ġhāfil ho ke jo pal bhar na ḳhud ko sochtā

is bharī bastī meñ koī be-ḳhabar aisā bhī thā

har na.ī rut meñ badal jaatī thī taḳhtī naam kī

jis ko ham apnā samajhte koī ghar aisā bhī thā

ruKH badalte hichkichate the ki Dar aisa bhi tha

hum hawa ke sath chalte the magar aisa bhi tha

lauT aati thin kai sabiq paton ki chiTThiyan

ghar badal dete the bashinde magar aisa bhi tha

wo kisi ka bhi na tha lekin tha sab ka mo'tabar

koi kya jaane ki us mein ek hunar aisa bhi tha

panw aainda ki jaanib sar guzishta ki taraf

yun bhi chalte the musafir ek safar aisa bhi tha

taulta tha ek ko ek ashya-e-masraf ki tarah

dosti thi aur andaz-e-nazar aisa bhi tha

KHud se ghafil ho ke jo pal bhar na KHud ko sochta

is bhari basti mein koi be-KHabar aisa bhi tha

har nai rut mein badal jati thi taKHti nam ki

jis ko hum apna samajhte koi ghar aisa bhi tha