ruKH-e-zardar par har-dam damakti shadmani hai

ruḳh-e-zardār par har-dam damaktī shādmānī hai

magar muflis ke chehra se ayaañ ġham kī nishānī hai

tum apnī dāstān-e-ġham zarā khul kar kaho mujh se

mire barbād hone kī to ik lambī kahānī hai

agar kuchh sochnā hai āqibat kī soch ai nādāñ

bharosa kyā hai duniyā kā ye duniyā ānī-jānī hai

baḌī muddat se ḳhvāhish hai guzāreñ saath kuchh lamhe

tumhāre shahr kī har shaam sunte haiñ suhānī hai

kahīñ bhūle se bhī us se na dil kī baat kah denā

mizāj-e-yār meñ kuchh aaj talḳhī hai girānī hai

ye kaise moḌ par tū zindagī le aa.ī hai mujh ko

jahāñ dil meñ koī ġham hai na koī shādmānī hai

lo ab to ahl-e-fikr-o-fan bhī kahte haiñ sar-e-mahfil

tere ash.ār meñ ai 'shauq' shoḳhī hai ravānī hai

ruKH-e-zardar par har-dam damakti shadmani hai

magar muflis ke chehra se ayan gham ki nishani hai

tum apni dastan-e-gham zara khul kar kaho mujh se

mere barbaad hone ki to ek lambi kahani hai

agar kuchh sochna hai aaqibat ki soch ai nadan

bharosa kya hai duniya ka ye duniya aani-jaani hai

baDi muddat se KHwahish hai guzaren sath kuchh lamhe

tumhaare shahr ki har sham sunte hain suhani hai

kahin bhule se bhi us se na dil ki baat kah dena

mizaj-e-yar mein kuchh aaj talKHi hai girani hai

ye kaise moD par tu zindagi le aai hai mujh ko

jahan dil mein koi gham hai na koi shadmani hai

lo ab to ahl-e-fikr-o-fan bhi kahte hain sar-e-mahfil

tere ashaar mein ai 'shauq' shoKHi hai rawani hai