ruKH hi badal diya hai gham-e-rozgar ka

ruḳh hī badal diyā hai ġham-e-rozgār kā

ye hausla hai kis ke dil-e-be-qarār kā

ai bāġhbāñ na phuul ko chuTkī se yuuñ masal

yaad aa.egā bahut hī zamāna bahār kā

ai mere ishq tū hī batā kyā javāb duuñ

vo haal pūchhte haiñ dil-e-be-qarār kā

ham ne tumhāre ishq meñ vo daaġh khaa.e haiñ

siine kā daaġh daaġh hai dāman bahār kā

terā jamāl-e-husn ki merā junūn-e-ishq

afsāne ko na baḳhsh de unvān daar kā

dar par nigāh haath garebāñ pe dam-ba-ḳhud

maiñ ik mujassama huuñ tire intizār kā

misl-e-kalīm husn se chashmak nahīñ pasand

ham jānte haiñ jiit meñ pahlū hai haar kā

kab us ke naqsh-e-pā pe na merī jabīñ jhukī

'jauhar' rahā hai mujh pe karam kirdgār kā

ruKH hi badal diya hai gham-e-rozgar ka

ye hausla hai kis ke dil-e-be-qarar ka

ai baghban na phul ko chuTki se yun masal

yaad aaega bahut hi zamana bahaar ka

ai mere ishq tu hi bata kya jawab dun

wo haal puchhte hain dil-e-be-qarar ka

hum ne tumhaare ishq mein wo dagh khae hain

sine ka dagh dagh hai daman bahaar ka

tera jamal-e-husn ki mera junun-e-ishq

afsane ko na baKHsh de unwan dar ka

dar par nigah hath gareban pe dam-ba-KHud

main ek mujassama hun tere intizar ka

misl-e-kalim husn se chashmak nahin pasand

hum jaante hain jit mein pahlu hai haar ka

kab us ke naqsh-e-pa pe na meri jabin jhuki

'jauhar' raha hai mujh pe karam kirdgar ka