ruKH ki rangat gulab ki si hai

ruḳh kī rañgat gulāb kī sī hai

aur chamak āftāb kī sī hai

kam-sinī meñ vo āfat-e-jāñ haiñ

jo adā hai shabāb kī sī hai

aap ke hote huur ko chāheñ

kyā vo sūrat janāb kī sī hai

ġhunche meñ koī baat bhī kahiye

dahan-e-lā-javāb kī sī hai

āñkheñ nargis laḌātī hai ham se

ye bhī us be-hijāb kī sī hai

ai gul-e-tar tire pasīne meñ

rañg aur bū gulāb kī sī hai

na ho bāvar to dekheñ ā.īna

shakl is meñ janāb kī sī hai

raushnī māh-o-mehr-e-anvar meñ

kab ruḳh-e-lā-javāb kī sī hai

abhī ubhre abhī miTeñge ham

apnī hastī habāb kī sī hai

kyuuñ na chūmeñ tumhārī sūrat ko

ye ḳhudā kī kitāb kī sī hai

tarz un ke sitam kī ai 'sābir'

karam-e-be-hisāb kī sī hai

ruKH ki rangat gulab ki si hai

aur chamak aaftab ki si hai

kam-sini mein wo aafat-e-jaan hain

jo ada hai shabab ki si hai

aap ke hote hur ko chahen

kya wo surat janab ki si hai

ghunche mein koi baat bhi kahiye

dahan-e-la-jawab ki si hai

aankhen nargis laDati hai hum se

ye bhi us be-hijab ki si hai

ai gul-e-tar tere pasine mein

rang aur bu gulab ki si hai

na ho bawar to dekhen aaina

shakl is mein janab ki si hai

raushni mah-o-mehr-e-anwar mein

kab ruKH-e-la-jawab ki si hai

abhi ubhre abhi miTenge hum

apni hasti habab ki si hai

kyun na chumen tumhaari surat ko

ye KHuda ki kitab ki si hai

tarz un ke sitam ki ai 'sabir'

karam-e-be-hisab ki si hai