ruKH-o-zulf ka hun fasana-KHwan yahi mashghala yahi kaam hai

ruḳh-o-zulf kā huuñ fasāna-ḳhvāñ yahī mashġhala yahī kaam hai

mujhe din kā chain azāb-e-jāñ mujhe shab kī niiñd harām hai

tire intizār meñ hai taab ye marīz-e-hijr hai jāñ-ba-lab

kahīñ aa bhī va.ada-ḳhilāf ab ki yahāñ to kaam tamām hai

kahūñ hasratoñ kā hujūm kyā dar-e-dil tak aa ke vo bevafā

mujhe ye sunā ke palaT gayā ki yahāñ to majma-e-ām hai

na vo mehr-o-māh kī tābisheñ na vo aḳhtaroñ kī numā.isheñ

na vo āsmāñ kī haiñ gardisheñ na vo sub.h hai na vo shaam hai

mire dam pe ishq meñ hai banī tujhe va.az-o-pand kī hai paḌī

mire nāsehā tujhe bandagī tirī dostī ko salām hai

na satā.eñ vo na satā.eñ vo idhar aa.eñ vo idhar aa.eñ vo

na sahī mujhī ko balā.eñ vo ye ḳhayāl-o-bātil-o-ḳhām hai

tap-e-ġham se hotī hai ab mafar ki tabīb-e-marg hai chāra-gar

mirā qissa aaj hai muḳhtasar mirī dāstān tamām hai

hai kahāñ vo sāqī-e-tund-ḳhū ki hai mai-kade meñ ye hā-o-hū

kahīñ sar-nigūñ haiñ ḳhum-o-subū kahīñ shīsha hai kahīñ jaam hai

nahīñ dil ko fikr ye be-sabab gayā din kahāñ huī raat kab

mujhe roz-e-vasl hai ajab abhī sub.h thī abhī shaam hai

na vo mehmān-e-harīm-e-dil na ḳhayāl is kā muqīm-e-dil

huī qat.a rasm-e-qadīm-e-dil na payām hai na salām hai

kahīñ husn vāloñ ke darmiyāñ ye ġhazal sunī to kahā ki haañ

ye hai nazm-e-'sāqib'-e-ḳhush-bayāñ ye usī kā tarz-e-kalām hai

ruKH-o-zulf ka hun fasana-KHwan yahi mashghala yahi kaam hai

mujhe din ka chain azab-e-jaan mujhe shab ki nind haram hai

tere intizar mein hai tab ye mariz-e-hijr hai jaan-ba-lab

kahin aa bhi wada-KHilaf ab ki yahan to kaam tamam hai

kahun hasraton ka hujum kya dar-e-dil tak aa ke wo bewafa

mujhe ye suna ke palaT gaya ki yahan to majma-e-am hai

na wo mehr-o-mah ki tabishen na wo aKHtaron ki numaishen

na wo aasman ki hain gardishen na wo subh hai na wo sham hai

mere dam pe ishq mein hai bani tujhe waz-o-pand ki hai paDi

mere naseha tujhe bandagi teri dosti ko salam hai

na sataen wo na sataen wo idhar aaen wo idhar aaen wo

na sahi mujhi ko balaen wo ye KHayal-o-baatil-o-KHam hai

tap-e-gham se hoti hai ab mafar ki tabib-e-marg hai chaara-gar

mera qissa aaj hai muKHtasar meri dastan tamam hai

hai kahan wo saqi-e-tund-KHu ki hai mai-kade mein ye ha-o-hu

kahin sar-nigun hain KHum-o-subu kahin shisha hai kahin jam hai

nahin dil ko fikr ye be-sabab gaya din kahan hui raat kab

mujhe roz-e-wasl hai ajab abhi subh thi abhi sham hai

na wo mehman-e-harim-e-dil na KHayal is ka muqim-e-dil

hui qata rasm-e-qadim-e-dil na payam hai na salam hai

kahin husn walon ke darmiyan ye ghazal suni to kaha ki han

ye hai nazm-e-'saqib'-e-KHush-bayan ye usi ka tarz-e-kalam hai