ruKH pe yun jhum kar wo laT jae

ruḳh pe yuuñ jhuum kar vo laT jaa.e

ḳhizr dekhe to umr kaT jaa.e

us nazāre se kyā bache koī

jo nigāhoñ se ḳhud lipaT jaa.e

ye bhī andher ham ne dekhā hai

raat ik zulf meñ simaT jaa.e

jaane tujh se udhar bhī kyā kuchh hai

kaash tū sāmne se haT jaa.e

maut ne khel ham ko jaanā hai

kabhī aa.e kabhī palaT jaa.e

Dūbne tak meñ nā-umīd nahīñ

kab na jaane havā palaT jaa.e

raat guzre na dard-e-dil Thahre

kuchh to baḌh jaa.e kuchh to ghaT jaa.e

un se kah kar bhī dekh leñ ġham-e-dil

'saif' ye kaam bhī nipaT jaa.e

ruKH pe yun jhum kar wo laT jae

KHizr dekhe to umr kaT jae

us nazare se kya bache koi

jo nigahon se KHud lipaT jae

ye bhi andher hum ne dekha hai

raat ek zulf mein simaT jae

jaane tujh se udhar bhi kya kuchh hai

kash tu samne se haT jae

maut ne khel hum ko jaana hai

kabhi aae kabhi palaT jae

Dubne tak mein na-umid nahin

kab na jaane hawa palaT jae

raat guzre na dard-e-dil Thahre

kuchh to baDh jae kuchh to ghaT jae

un se kah kar bhi dekh len gham-e-dil

'saif' ye kaam bhi nipaT jae