ruKH se burqa jo ulaT de wo to aafat ho jae

ruḳh se burqā jo ulaT de vo to aafat ho jaa.e

qad-kashī ho to numūdār qayāmat ho jaa.e

daulat-e-husn-e-butāñ se to na rahiye mahrūm

bādshāhī na ho par ishq kī daulat ho jaa.e

haal dekhe tire hairāñ kā jo ai ā.ina-rū

hai yaqīñ dīda-e-tasvīr ko riqqat ho jaa.e

naam ghar jaane kā le yaar agar tū shab-e-vasl

ḳhāna-e-tan se yahāñ jaan bhī ruḳhsat ho jaa.e

tā.ir-e-bāġh asīrān-e-balā nāhaq haiñ

abhī uḌ jaa.eñ tasavvur meñ jo himmat ho jaa.e

intizār-e-but-e-be-pīr se kyā is kā ajab

mar ga.e par bhī jo vā dīda-e-hasrat ho jaa.e

dostoñ kā ye huā haal ki kahtī hai ḳhalq

dushmanoñ ko bhī tire saath na ulfat ho jaa.e

ik nazar dekhe tirā husn jo ai ā.īna-rū

abhī tasvīr kā vā dīda-e-hairat ho jaa.e

tab.a-e-ālī yahī kahtī hai qalam se har dam

sher vo likh tū ki āfāq meñ shohrat ho jaa.e

ruKH se burqa jo ulaT de wo to aafat ho jae

qad-kashi ho to numudar qayamat ho jae

daulat-e-husn-e-butan se to na rahiye mahrum

baadshahi na ho par ishq ki daulat ho jae

haal dekhe tere hairan ka jo ai aaina-ru

hai yaqin dida-e-taswir ko riqqat ho jae

nam ghar jaane ka le yar agar tu shab-e-wasl

KHana-e-tan se yahan jaan bhi ruKHsat ho jae

tair-e-bagh asiran-e-bala nahaq hain

abhi uD jaen tasawwur mein jo himmat ho jae

intizar-e-but-e-be-pir se kya is ka ajab

mar gae par bhi jo wa dida-e-hasrat ho jae

doston ka ye hua haal ki kahti hai KHalq

dushmanon ko bhi tere sath na ulfat ho jae

ek nazar dekhe tera husn jo ai aaina-ru

abhi taswir ka wa dida-e-hairat ho jae

taba-e-ali yahi kahti hai qalam se har dam

sher wo likh tu ki aafaq mein shohrat ho jae