رخ سے گیسو ہٹا مہرباں بات کر

رخ سے گیسو ہٹا مہرباں بات کر

ٹوٹیں خاموشیاں میری جاں بات کر

مجھ کو پھر سے سنا کوئی شیریں سخن

دل پہ اترے مرے کہکشاں بات کر

یہ سلیقہ محبت سکھاتی ہے بس

خامشی ہو کہاں اور کہاں بات کر

چار موسم تو دنیا میں موجود ہیں

تجھ کو لا دوں کوئی پانچواں بات کر

پیٹھ پیچھے برائی مناسب نہیں

سامنے بیٹھ میرے یہاں بات کر

حبس بے جا میں دم گھٹ رہا ہے مرا

اے زمیں بات کر آسماں بات کر

تو مرے غم کو چھوٹا سمجھتا رہا

دیکھ زخموں کے دل پر نشاں بات کر