ruKH se uThti hai naqab-e-mah-e-taban har shab

ruḳh se uThtī hai naqāb-e-mah-e-tābāñ har shab

lahlahāte haiñ nigāhoñ meñ gulistāñ har shab

aan kī aan meñ āfāq pe chhā jaatā hai

nik.hat-o-nūr kā umḌā huā tūfāñ har shab

tere jalvoñ se charāġhāñ kā samāñ rahtā hai

jagmagā uThtī hai ye manzil-e-vīrāñ har shab

terī sāñsoñ kī mahak jin meñ basī rahtī hai

in havāoñ se mahaktā hai shabistāñ har shab

tere nikhre hue angoñ ke hasīñ rang liye

raqs kartī hai bahār-e-chamanistāñ har shab

'ālam-e-nashsha meñ rū-e-'araq-ālūda par

vo laTeñ hotī haiñ lahrā ke pareshāñ har shab

sāġhar-e-bāda liye saaz kī āvāz ke saath

nāchtī rahtī hai rūh-e-tarabistāñ har shab

dīda-o-dil pe kiyā kartī hai kyā kyā jaadū

mastī-o-shoḳhī-e-chashmān-e-ġhazālāñ har shab

jaam us nargis-e-sarshār se le kar 'muztar'

rang-o-āhang se hotā hai ġhazal-ḳhvāñ har shab

ruKH se uThti hai naqab-e-mah-e-taban har shab

lahlahate hain nigahon mein gulistan har shab

aan ki aan mein aafaq pe chha jata hai

nikhat-o-nur ka umDa hua tufan har shab

tere jalwon se charaghan ka saman rahta hai

jagmaga uThti hai ye manzil-e-viran har shab

teri sanson ki mahak jin mein basi rahti hai

in hawaon se mahakta hai shabistan har shab

tere nikhre hue angon ke hasin rang liye

raqs karti hai bahaar-e-chamanistan har shab

'alam-e-nashsha mein ru-e-'araq-aluda par

wo laTen hoti hain lahra ke pareshan har shab

saghar-e-baada liye saz ki aawaz ke sath

nachti rahti hai ruh-e-tarabistan har shab

dida-o-dil pe kiya karti hai kya kya jadu

masti-o-shoKHi-e-chashman-e-ghazalan har shab

jam us nargis-e-sarshaar se le kar 'muztar'

rang-o-ahang se hota hai ghazal-KHwan har shab