رخ سے اٹھتی ہے نقاب مہ تاباں ہر شب

رخ سے اٹھتی ہے نقاب مہ تاباں ہر شب

لہلہاتے ہیں نگاہوں میں گلستاں ہر شب

آن کی آن میں آفاق پہ چھا جاتا ہے

نکہت و نور کا امڑا ہوا طوفاں ہر شب

تیرے جلوؤں سے چراغاں کا سماں رہتا ہے

جگمگا اٹھتی ہے یہ منزل‌ ویراں ہر شب

تیری سانسوں کی مہک جن میں بسی رہتی ہے

ان ہواؤں سے مہکتا ہے شبستاں ہر شب

تیرے نکھرے ہوئے انگوں کے حسیں رنگ لیے

رقص کرتی ہے بہار چمنستاں ہر شب

عالم نشہ میں روئے عرق آلودہ پر

وہ لٹیں ہوتی ہیں لہرا کے پریشاں ہر شب

ساغر بادہ لیے ساز کی آواز کے ساتھ

ناچتی رہتی ہے روح طربستاں ہر شب

دیدہ و دل پہ کیا کرتی ہے کیا کیا جادو

مستی و شوخیٔ چشمان غزالاں ہر شب

جام اس نرگس سرشار سے لے کر مضطرؔ

رنگ و آہنگ سے ہوتا ہے غزلخواں ہر شب