ruKHsat ai ham-safaro shahar-e-nigar aa hi gaya

ruḳhsat ai ham-safaro shahar-e-nigār aa hī gayā

ḳhuld bhī jis pe ho qurbāñ vo dayār aa hī gayā

ye junūñ-zār mirā mere ġhazāloñ kā jahāñ

merā najd aa hī gayā merā tatār aa hī gayā

aaj phirtā ba-chaman darpai-e-gul-hā-e-chaman

gungunātā huā zambūr-e-bahār aa hī gayā

gesuoñ vāloñ meñ abrū ke kamāñ-dāroñ meñ

ek said aa hī gayā ek shikār aa hī gayā

bāġhbānoñ ko batāo gul-o-nasrīñ se kaho

ik ḳharāb-e-gul-o-nasrīn-e-bahār aa hī gayā

ḳhair-maqdam ko mire koī ba-hañgām-e-sahar

apnī āñkhoñ meñ liye shab kā ḳhumār aa hī gayā

zulf kā abr-e-siyah bāzū-e-sīmīñ pe liye

phir koī ḳhema-zan-e-sāz-e-bahār aa hī gayā

ho ga.ī tishna-labī aaj rahīn-e-kausar

mere lab par lab-e-lālīn-e-nigār aa hī gayā

ruKHsat ai ham-safaro shahar-e-nigar aa hi gaya

KHuld bhi jis pe ho qurban wo dayar aa hi gaya

ye junun-zar mera mere ghazalon ka jahan

mera najd aa hi gaya mera tatar aa hi gaya

aaj phirta ba-chaman darpai-e-gul-ha-e-chaman

gungunata hua zambur-e-bahaar aa hi gaya

gesuon walon mein abru ke kaman-daron mein

ek said aa hi gaya ek shikar aa hi gaya

baghbanon ko batao gul-o-nasrin se kaho

ek KHarab-e-gul-o-nasrin-e-bahaar aa hi gaya

KHair-maqdam ko mere koi ba-hangam-e-sahar

apni aankhon mein liye shab ka KHumar aa hi gaya

zulf ka abr-e-siyah bazu-e-simin pe liye

phir koi KHema-zan-e-saz-e-bahaar aa hi gaya

ho gai tishna-labi aaj rahin-e-kausar

mere lab par lab-e-lalin-e-nigar aa hi gaya