rukti nahin hai gardish-e-dauran kaha na tha

ruktī nahīñ hai gardish-e-daurāñ kahā na thā

uTThā kareñge nit-na.e tūfāñ kahā na thā

baḌhtā rahegā hausla-e-jabr-o-iḳhtiyār

taḌpā kareñge zulm se insāñ kahā na thā

har roz hoñge qatl ke sāmāñ na.e na.e

har shaam hogī shām-e-ġharībāñ kahā na thā

jaarī rahā jo silsila-e-zabt-e-ārzū

lau de uThegī sozish-e-pinhāñ kahā na thā

tazlīl-e-e'tibār-o-yaqīñ hoñge harf-o-saut

luTtī rahegī daulat-e-īmāñ kahā na thā

duniyā se munsifī kī tavaqqo fuzūl hai

baiThe rahoge hashr-ba-dāmāñ kahā na thā

rukti nahin hai gardish-e-dauran kaha na tha

uTTha karenge nit-nae tufan kaha na tha

baDhta rahega hausla-e-jabr-o-iKHtiyar

taDpa karenge zulm se insan kaha na tha

har roz honge qatl ke saman nae nae

har sham hogi sham-e-ghariban kaha na tha

jari raha jo silsila-e-zabt-e-arzu

lau de uThegi sozish-e-pinhan kaha na tha

tazlil-e-e'tibar-o-yaqin honge harf-o-saut

luTti rahegi daulat-e-iman kaha na tha

duniya se munsifi ki tawaqqo fuzul hai

baiThe rahoge hashr-ba-daman kaha na tha