rulaega aansu bahana hamara

rulā.egā aañsū bahānā hamārā

hañsī tum na samjho rulānā hamārā

satī sham.a parvāne ke saath hogī

jalā.egā us ko jalānā hamārā

ye phoḌā jo phūTā to achchhā na hogā

samajh buujh kar dil dukhānā hamārā

bas ab zindagī beḌiyoñ meñ kaTegī

na utregā paañv se baanā hamārā

lipaTte haiñ pariyoñ se saa.e kī sūrat

junūñ bhī hai kyā āqilāna hamārā

agar raaz ifshā ho apne junūñ kā

qadam chūme bahlol-e-dānā hamārā

barahman shivāle meñ masjid meñ vaa.iz

jahāñ meñ nahīñ ab Thikānā hamārā

rasā.ī dar-e-yār tak mudda.ā hai

gadā.ī bhī hai ik bahānā hamārā

kahāñ chhoḌ kar jā.iye un guloñ ko

ye sho.ale haiñ aur āshiyānā hamārā

nasīboñ meñ likkhā hai vo ḳhāl-bīnī

tapanche kā chharrā hai daanā hamārā

na ā.eñge ham ḳhāna-ābād sāhab

agar nāgavārā hai aanā hamārā

tumhāre tajassus meñ aise hue gum

hameñ bhī na sūjhā Thikānā hamārā

mohabbat ke kānoñ se ai 'bahr' suniye

har ek sher hai āshiqāna hamārā

rulaega aansu bahana hamara

hansi tum na samjho rulana hamara

sati shama parwane ke sath hogi

jalaega us ko jalana hamara

ye phoDa jo phuTa to achchha na hoga

samajh bujh kar dil dukhana hamara

bas ab zindagi beDiyon mein kaTegi

na utrega panw se bana hamara

lipaTte hain pariyon se sae ki surat

junun bhi hai kya aaqilana hamara

agar raaz ifsha ho apne junun ka

qadam chume bahlol-e-dana hamara

barahman shiwale mein masjid mein waiz

jahan mein nahin ab Thikana hamara

rasai dar-e-yar tak muddaa hai

gadai bhi hai ek bahana hamara

kahan chhoD kar jaiye un gulon ko

ye shoale hain aur aashiyana hamara

nasibon mein likkha hai wo KHal-bini

tapanche ka chharra hai dana hamara

na aaenge hum KHana-abaad sahab

agar nagawara hai aana hamara

tumhaare tajassus mein aise hue gum

hamein bhi na sujha Thikana hamara

mohabbat ke kanon se ai 'bahr' suniye

har ek sher hai aashiqana hamara