ruswa ba-qadr-e-zauq-e-tamanna nahin hun main

rusvā ba-qadr-e-zauq-e-tamannā nahīñ huuñ maiñ

apne uruuj par abhī pahūñchā nahīñ huuñ maiñ

nairañg-e-qaid-e-hastī-e-fānī na pūchhiye

martā huuñ roz aur kabhī martā nahīñ huuñ maiñ

tāsīr hī bayāñ meñ na ho jab to kyā karūñ

kyā apnā haal un ko sunātā nahīñ huuñ maiñ

jo mujh ko dekhte haiñ tujhe dekhte haiñ vo

shāyad tirī nigāh kā pardā nahīñ huuñ maiñ

kaafī hai mujh ko ik nazar iltifāt-e-dil

sargarm-e-ārzū-e-tamashā nahīñ huuñ maiñ

itnā ḳhayāl-e-dost ne be-ḳhud banā diyā

pahroñ ab apne hosh meñ aatā nahīñ huuñ maiñ

kyuuñ hañs rahe haiñ merī hañsī par sab ai junūñ

kyā qābil-e-masarrat-e-duniyā nahīñ huuñ maiñ

be-kār jāntā huuñ fusūn-e-umīd ko

nā-vāqif-e-fareb-e-tamannā nahīñ huuñ maiñ

māyūs ho chale haiñ malāmat-garān-e-ishq

vo vaqt hai ki baat samajhtā nahīñ huuñ maiñ

jalva ba-qadr-e-zauq ho ai barq-e-husn-e-dost

muusā kā ham-ḳhayāl huuñ muusā nahīñ huuñ maiñ

'shaukat' kashish zarūr hai is jalva-gāh meñ

māyūs-e-jazb-e-zauq-e-tamāshā nahīñ huuñ maiñ

ruswa ba-qadr-e-zauq-e-tamanna nahin hun main

apne uruj par abhi pahuncha nahin hun main

nairang-e-qaid-e-hasti-e-fani na puchhiye

marta hun roz aur kabhi marta nahin hun main

tasir hi bayan mein na ho jab to kya karun

kya apna haal un ko sunata nahin hun main

jo mujh ko dekhte hain tujhe dekhte hain wo

shayad teri nigah ka parda nahin hun main

kafi hai mujh ko ek nazar iltifat-e-dil

sargarm-e-arzu-e-tamasha nahin hun main

itna KHayal-e-dost ne be-KHud bana diya

pahron ab apne hosh mein aata nahin hun main

kyun hans rahe hain meri hansi par sab ai junun

kya qabil-e-masarrat-e-duniya nahin hun main

be-kar jaanta hun fusun-e-umid ko

na-waqif-e-fareb-e-tamanna nahin hun main

mayus ho chale hain malamat-garan-e-ishq

wo waqt hai ki baat samajhta nahin hun main

jalwa ba-qadr-e-zauq ho ai barq-e-husn-e-dost

musa ka ham-KHayal hun musa nahin hun main

'shaukat' kashish zarur hai is jalwa-gah mein

mayus-e-jazb-e-zauq-e-tamasha nahin hun main