رسوا ہو جو دنیا میں وہ مے خوار ہمیں ہیں

رسوا ہو جو دنیا میں وہ مے خوار ہمیں ہیں

سب عابد و زاہد ہیں گنہ گار ہمیں ہیں

اب خوبیٔ قسمت نہ کہیں اس کو کہیں کیا

تقصیر کسی کی ہو خطا‌ وار ہمیں ہیں

لغزش پہ ہماری کبھی تنقید نہ کرنا

اے بے خبرو صاحب کردار ہمیں ہیں

ان کی نگہ ناز پہ کوئی نہیں الزام

سچ یہ ہے محبت کے خطا کار ہمیں ہیں

اک پھول بھی دامن کو میسر نہیں آتا

مانا کہ ہر اک پھول کے حق دار ہمیں ہیں

ناقدرئ ارباب ہنر دیکھ کے شاعرؔ

جو فن سے پشیماں ہو وہ فنکار ہمیں ہیں