ruswa hue zalil hue dar-ba-dar hue

rusvā hue zalīl hue dar-ba-dar hue

haq baat lab pe aa.ī to ham be-hunar hue

kal tak jahāñ meñ jin ko koī pūchhtā na thā

is shahr-e-be-charāġh meñ vo mo'tabar hue

baḌhne lagī haiñ aur zamānoñ kī dūriyāñ

yuuñ fāsle to aaj bahut muḳhtasar hue

dil ke makāñ se ḳhauf ke saa.e na chhaT sake

raste to duur duur talak be-ḳhatar hue

ab ke safar meñ dard ke pahlū ajiib haiñ

jo log ham-ḳhayāl na the ham-safar hue

badlā jo rañg vaqt ne manzar badal ga.e

āhan-misāl log bhī zer-o-zabar hue

ruswa hue zalil hue dar-ba-dar hue

haq baat lab pe aai to hum be-hunar hue

kal tak jahan mein jin ko koi puchhta na tha

is shahr-e-be-charagh mein wo mo'tabar hue

baDhne lagi hain aur zamanon ki duriyan

yun fasle to aaj bahut muKHtasar hue

dil ke makan se KHauf ke sae na chhaT sake

raste to dur dur talak be-KHatar hue

ab ke safar mein dard ke pahlu ajib hain

jo log ham-KHayal na the ham-safar hue

badla jo rang waqt ne manzar badal gae

aahan-misal log bhi zer-o-zabar hue