ruswa kiya hai usne jahan-bhar ke samne

rusvā kiyā hai us ne jahāñ-bhar ke sāmne

parde meñ chhup gayā hai mujhe kar ke sāmne

sajda hai inhidām hai kyā hai mujhe batā

qasr-e-badan girā hai kisī dar ke sāmne

uryānī baḌh rahī hai mire ghar ke bīchoñ-bīch

dīvāreñ uTh rahī haiñ mire ghar ke sāmne

ye vaqfa-e-namāz bhī kitnā tavīl hai

kab se khaḌā huuñ yaar ke daftar ke sāmne

kaise charāġh se karūñ shikva ki jab mirī

chashm-e-nazāra bujh ga.ī manzar ke sāmne

pūchhe koī jo raaz ke dil kā to ye kaho

ik ghar hai aur ghar bhī samundar ke sāmne

ruswa kiya hai us ne jahan-bhar ke samne

parde mein chhup gaya hai mujhe kar ke samne

sajda hai inhidam hai kya hai mujhe bata

qasr-e-badan gira hai kisi dar ke samne

uryani baDh rahi hai mere ghar ke bichon-bich

diwaren uTh rahi hain mere ghar ke samne

ye waqfa-e-namaz bhi kitna tawil hai

kab se khaDa hun yar ke daftar ke samne

kaise charagh se karun shikwa ki jab meri

chashm-e-nazara bujh gai manzar ke samne

puchhe koi jo raaz ke dil ka to ye kaho

ek ghar hai aur ghar bhi samundar ke samne