رسوائیاں ہوں لاکھ مگر چاہئے مجھے

رسوائیاں ہوں لاکھ مگر چاہئے مجھے

اس شہر دل نواز میں گھر چاہئے مجھے

مجھ کو ترے جمال نظر کی ہے جستجو

جگنو نہ کہکشاں نہ قمر چاہئے مجھے

اس دور پر فتن میں جو دل کو ملا سکے

دنیا میں کوئی ایسا بشر چاہئے مجھے

جتنا ہے میرے بس میں وہ سب کچھ کروں گا میں

تھوڑا سا تیرا حسن نظر چاہئے مجھے

تیرے لبوں سے ایک تبسم کا ہے سوال

میں جا رہا ہوں رخت سفر چاہئے مجھے

جتنا بھی میرا حق ہے مجھے سب نہ دو مگر

کچھ تو مرے عمل کا ثمر چاہئے مجھے

کرتا رہوں ہمیشہ ترا نام سر بلند

اک سر کٹے تو دوسرا سر چاہئے مجھے

ناظرؔ سہوں گا کس طرح صحرا کی تیز دھوپ

راہوں میں سایہ دار شجر چاہئے مجھے