ruswaiyan hon lakh magar chahiye mujhe

rusvā.iyāñ hoñ laakh magar chāhiye mujhe

is shahr-e-dil-navāz meñ ghar chāhiye mujhe

mujh ko tire jamāl-e-nazar kī hai justujū

jugnū na kahkashāñ na qamar chāhiye mujhe

is daur-e-pur-fitan meñ jo dil ko milā sake

duniyā meñ koī aisā bashar chāhiye mujhe

jitnā hai mere bas meñ vo sab kuchh karūñgā maiñ

thoḌā sā terā husn-e-nazar chāhiye mujhe

tere laboñ se ek tabassum kā hai savāl

maiñ jā rahā huuñ raḳht-e-safar chāhiye mujhe

jitnā bhī merā haq hai mujhe sab na do magar

kuchh to mire 'amal kā samar chāhiye mujhe

kartā rahūñ hamesha tirā naam sar-buland

ik sar kaTe to dūsrā sar chāhiye mujhe

'nāzir' sahūñgā kis tarah sahrā kī tez dhuup

rāhoñ meñ sāya-dār shajar chāhiye mujhe

ruswaiyan hon lakh magar chahiye mujhe

is shahr-e-dil-nawaz mein ghar chahiye mujhe

mujh ko tere jamal-e-nazar ki hai justuju

jugnu na kahkashan na qamar chahiye mujhe

is daur-e-pur-fitan mein jo dil ko mila sake

duniya mein koi aisa bashar chahiye mujhe

jitna hai mere bas mein wo sab kuchh karunga main

thoDa sa tera husn-e-nazar chahiye mujhe

tere labon se ek tabassum ka hai sawal

main ja raha hun raKHt-e-safar chahiye mujhe

jitna bhi mera haq hai mujhe sab na do magar

kuchh to mere 'amal ka samar chahiye mujhe

karta rahun hamesha tera nam sar-buland

ek sar kaTe to dusra sar chahiye mujhe

'nazir' sahunga kis tarah sahra ki tez dhup

rahon mein saya-dar shajar chahiye mujhe