rut badalti hai badalta nahin manzar sain

rut badaltī hai badaltā nahīñ manzar sā.īñ

ab kahāñ jaa.e batā terā qalandar sā.īñ

ik mire naam nahīñ terī saḳhāvat varna

jagmagātā hai karishma tirā dar dar sā.īñ

shahr kā shahr huā jaatā hai kaise sairāb

kaun aayā hai yahāñ le ke samundar sā.īñ

ab to mahsūs ye hotā hai ki manzil hai qarīb

rāsta aisā nahīñ hotā munavvar sā.īñ

koī kuchh bhī na kahe shahar-e-adāvat hī sahī

ham to ābād hue haiñ yahāñ luT kar sā.īñ

shā'irī jis ke liye kī vo sirā hai to hai baat

laakh duniyā mujhe kahtī hai suḳhanvar sā.īñ

phir kisī roz tamannā ke qadam chūmūñgā

aaj to jaane diyā jaa.e mujhe ghar sā.īñ

karbalā hai to yahāñ sar kī bhī qīmat hogī

kuchh to in'ām rahegā mire sar par sā.īñ

rut badalti hai badalta nahin manzar sain

ab kahan jae bata tera qalandar sain

ek mere nam nahin teri saKHawat warna

jagmagata hai karishma tera dar dar sain

shahr ka shahr hua jata hai kaise sairab

kaun aaya hai yahan le ke samundar sain

ab to mahsus ye hota hai ki manzil hai qarib

rasta aisa nahin hota munawwar sain

koi kuchh bhi na kahe shahar-e-adawat hi sahi

hum to aabaad hue hain yahan luT kar sain

sha'iri jis ke liye ki wo sira hai to hai baat

lakh duniya mujhe kahti hai suKHanwar sain

phir kisi roz tamanna ke qadam chumunga

aaj to jaane diya jae mujhe ghar sain

karbala hai to yahan sar ki bhi qimat hogi

kuchh to in'am rahega mere sar par sain