ruton ke rang badalte hue bhi banjar hai

rutoñ ke rañg badalte hue bhī banjar hai

vo ek ḳhaas 'ilāqa jo dil ke andar hai

ghaḌī ghaḌī mirī āñkhoñ meñ uḌ rahī hai dhuul

sadī sadī kā mirī raah meñ samundar hai

bujhā bujhā huā rahtā huuñ apne ḳhvāboñ meñ

dhuāñ dhuāñ sā mire jāgne kā manzar hai

'ajīb ḳhvāb sā dekhā ki puure dariyā meñ

koī jahāz kahīñ hai na koī lañgar hai

badan pe TuuT bikharne ko hai kahīñ na kahīñ

hirās-o-ḳhauf kā saaya jo mere sar par hai

maiñ kis kī khoj meñ yuuñ hī bitā rahā huuñ janm

chhupā huā mire saa.e meñ kis kā paikar hai

sunā rahī hai havā apne hī safar-nāme

'ajīb shor ghane jañgaloñ ke andar hai

ruton ke rang badalte hue bhi banjar hai

wo ek KHas 'ilaqa jo dil ke andar hai

ghaDi ghaDi meri aankhon mein uD rahi hai dhul

sadi sadi ka meri rah mein samundar hai

bujha bujha hua rahta hun apne KHwabon mein

dhuan dhuan sa mere jagne ka manzar hai

'ajib KHwab sa dekha ki pure dariya mein

koi jahaz kahin hai na koi langar hai

badan pe TuT bikharne ko hai kahin na kahin

hiras-o-KHauf ka saya jo mere sar par hai

main kis ki khoj mein yun hi bita raha hun janm

chhupa hua mere sae mein kis ka paikar hai

suna rahi hai hawa apne hi safar-name

'ajib shor ghane jangalon ke andar hai