ru-ba-ru but ke dua ki bhul ho jae to phir

rū-ba-rū but ke duā kī bhuul ho jaa.e to phir

aur phir vo hī duā maqbūl ho jaa.e to phir

maiñ baḌhā.ūñ haath jis kāñTe kī jānib shauq se

haath meñ aa kar vo kāñTā phuul ho jaa.e to phir

bādbānoñ par havā ho mehrbāñ aur daf.atan

TukḌe TukḌe naav kā mastūl ho jaa.e to phir

nafrateñ be-zāriyāñ buġhz-o-ta.assub dushmanī

zindagī kā bas yahī ma.amūl ho jaa.e to phir

qātiloñ ko kar diyā jaa.e barī ilzām se

vājib-e-ta.azīr ḳhud maqtūl ho jaa.e to phir

lamha lamha manzileñ hotī chalī jaa.eñ ba.iid

aur qismat rāste kī dhuul ho jaa.e to phir

hāl-e-dil apnā bayāñ karne kī ḳhvāhish hai magar

kuchh tavajjoh aap kī mabzūl ho jaa.e to phir

ru-ba-ru but ke dua ki bhul ho jae to phir

aur phir wo hi dua maqbul ho jae to phir

main baDhaun hath jis kanTe ki jaanib shauq se

hath mein aa kar wo kanTa phul ho jae to phir

baadbanon par hawa ho mehrban aur dafatan

TukDe TukDe naw ka mastul ho jae to phir

nafraten be-zariyan bughz-o-tassub dushmani

zindagi ka bas yahi mamul ho jae to phir

qatilon ko kar diya jae bari ilzam se

wajib-e-tazir KHud maqtul ho jae to phir

lamha lamha manzilen hoti chali jaen baid

aur qismat raste ki dhul ho jae to phir

haal-e-dil apna bayan karne ki KHwahish hai magar

kuchh tawajjoh aap ki mabzul ho jae to phir