ru-ba-ru sab hain koi gosh-bar-awaz nahin

rū-ba-rū sab haiñ koī gosh-bar-āvāz nahīñ

ye vo anjām hai jis kā abhī āġhāz nahīñ

arsa-e-hashr hai yārab ki hai bazm-e-gītī

kisī āvāz meñ shāmil koī āvāz nahīñ

vaqt mujh ko nazar-andāz nahīñ kar saktā

maiñ abhī vaqt ke aage sipar-andāz nahīñ

dil-e-har-zarra kī dhaḌkan meñ samak tā-ba-samā

bāzgasht us kī hai jis kī koī āvāz nahīñ

kyā yahī shahr-e-mohabbat hai jahāñ mere liye

vā ik āġhosh nahīñ ek bhī dar baaz nahīñ

sāz-e-hastī ke pas-e-parda ba-andāz-e-kashish

koī āhañg koī lai koī āvāz nahīñ

ruuh masrūf-e-pazīrā.ī hai kis kī 'at.har'

koī aahaT koī dastak koī āvāz nahīñ

ru-ba-ru sab hain koi gosh-bar-awaz nahin

ye wo anjam hai jis ka abhi aaghaz nahin

arsa-e-hashr hai yarab ki hai bazm-e-giti

kisi aawaz mein shamil koi aawaz nahin

waqt mujh ko nazar-andaz nahin kar sakta

main abhi waqt ke aage sipar-andaz nahin

dil-e-har-zarra ki dhaDkan mein samak ta-ba-sama

bazgasht us ki hai jis ki koi aawaz nahin

kya yahi shahr-e-mohabbat hai jahan mere liye

wa ek aaghosh nahin ek bhi dar baz nahin

saz-e-hasti ke pas-e-parda ba-andaz-e-kashish

koi aahang koi lai koi aawaz nahin

ruh masruf-e-pazirai hai kis ki 'athar'

koi aahaT koi dastak koi aawaz nahin