ru-e-KHandan rag-e-jaan dida-e-giryan jaise

rū-e-ḳhandāñ rag-e-jāñ dīda-e-giryāñ jaise

qafas-e-rañg hai ye ālam-e-imkāñ jaise

nashsha-e-sher uḌaa.e liye jaatā hai mujhe

jaise rahvār-e-sabā taḳht-e-sulaimāñ jaise

aarzū hī se hai hañgāma-e-ālam saarā

aarzū hī se hai dil tiflak-e-nādāñ jaise

aañch bhī aatī hai ḳhush-pairahnī se aksar

kahīñ roīdagī-e-sho.ala ho pinhāñ jaise

shām-e-tanhā.ī kalīd-e-dar-e-nazzārā hai

jaise mizhgān-e-siyah abru-e-jānāñ jaise

harf-e-sāda varaq-e-nam suḳhan-e-ḳhud-rafta

dil hai yā mīr-taqī-'mīr' kā dīvāñ jaise

be-ravā be-sar-o-pā ek alam-nāk sadā

zindagī qāfila-e-shām-e-ġharībāñ jaise

būḌhe bargad ke tale soch meñ gum mard-e-faqīr

aane vaalā hai kahīñ se koī tūfāñ jaise

ru-e-KHandan rag-e-jaan dida-e-giryan jaise

qafas-e-rang hai ye aalam-e-imkan jaise

nashsha-e-sher uDae liye jata hai mujhe

jaise rahwar-e-saba taKHt-e-sulaiman jaise

aarzu hi se hai hangama-e-alam sara

aarzu hi se hai dil tiflak-e-nadan jaise

aanch bhi aati hai KHush-pairahni se aksar

kahin roidagi-e-shoala ho pinhan jaise

sham-e-tanhai kalid-e-dar-e-nazzara hai

jaise mizhgan-e-siyah abru-e-jaanan jaise

harf-e-sada waraq-e-nam suKHan-e-KHud-rafta

dil hai ya mir-taqi-'mir' ka diwan jaise

be-rawa be-sar-o-pa ek alam-nak sada

zindagi qafila-e-sham-e-ghariban jaise

buDhe bargad ke tale soch mein gum mard-e-faqir

aane wala hai kahin se koi tufan jaise