rudad-e-shauq ye hai meri muKHtasar tamam

rūdād-e-shauq ye hai mirī muḳhtasar tamām

ra.anā.iyoñ meñ kho gayā zauq-e-nazar tamām

guzrā hai gul-badan koī merī talāsh meñ

mahkī huī hai aaj mirī rahguzar tamām

vo din bhī kyā the jab thī havāoñ se guftugū

ab ham se baat karte haiñ dīvār-o-dar tamām

ḳhud apnā ehtisāb gavārā nahīñ unheñ

auroñ meñ aib DhūñDte haiñ dīda-var tamām

tanhā.iyāñ nasīb kā unvān ban ga.iiñ

ek ek kar ke chhūT ga.e ham-safar tamām

hone lage haiñ merī ḳhamoshī pe tabsire

ab jaan le ke chhoḌeñge ye chāragar tamām

kyā soch kar chale the 'ziyā' rāh-e-shauq meñ

shāyad na ho sake ye safar umr-bhar tamām

rudad-e-shauq ye hai meri muKHtasar tamam

ranaiyon mein kho gaya zauq-e-nazar tamam

guzra hai gul-badan koi meri talash mein

mahki hui hai aaj meri rahguzar tamam

wo din bhi kya the jab thi hawaon se guftugu

ab hum se baat karte hain diwar-o-dar tamam

KHud apna ehtisab gawara nahin unhen

auron mein aib DhunDte hain dida-war tamam

tanhaiyan nasib ka unwan ban gain

ek ek kar ke chhuT gae ham-safar tamam

hone lage hain meri KHamoshi pe tabsire

ab jaan le ke chhoDenge ye chaaragar tamam

kya soch kar chale the 'ziya' rah-e-shauq mein

shayad na ho sake ye safar umr-bhar tamam