روح زماں مکاں ملے راز عیاں نہاں ملے

روح زماں مکاں ملے راز عیاں نہاں ملے

کب سے ہوں گرم جستجو منزل کن فکاں ملے

نادرۂ زماں ملے نابغٔہ جہاں ملے

جس کو میں ڈھونڈھتا ہوں وہ نازش مہوشاں ملے

نالۂ ارغواں ملے شعلۂ ارغواں ملے

صاعقۂ تپاں ملے جلوۂ بے اماں ملے

کاکل کہکشاں کھلے عارض لا مکاں ملے

دلبر ہست و بود کا کاش کہیں نشاں ملے

یوں تو ہمیں ہزارہا جلوے جہاں تہاں ملے

جس کی مگر تلاش ہے دیکھیے کب کہاں ملے

ڈھونڈ رہے ہیں آج تک جن کو وہی کہاں ملے

ورنہ رہ حیات میں سینکڑوں کارواں ملے

شعلہ فشاں زمین پر سینکڑوں آسماں ملے

دل کو جہاں سکوں ملے کاش وہ آستاں ملے

میری نظر میں کم نہیں وہ بھی کسی سے خوش نصیب

جس کو غم فراق کی دولت بیکراں ملے

وجہ نشاط شوق ہے کتنا حسیں وہ ایک غم

یوں تو یہاں ہزارہا روز غم نہاں ملے

سوچ رہے ہیں آج ہم اپنی بھی قدر کیا ہے کم

وہ ہمیں گر نہ مل سکے ہم بھی انہیں کہاں ملے

ان کے لئے گل و بہار اور ہمیں خزاں و خار

ان کو بھی گلستاں ملے ہم کو بھی گلستاں ملے

سوز و گداز و درد و غم حسرت و دل شکستگی

زیست میں کتنے قیمتی ہم کو یہ ارمغاں ملے

قریہ بہ قریہ شہر شہر ٹوٹ رہا ہے آج قہر

چیخ اٹھی ہے روح دہر کاش کہیں اماں ملے

شمع جنوں لئے ہوئے ڈھونڈ رہا ہے شہر شہر

عہد خرد میں رازؔ کو کوئی تو راز داں ملے