ruh ke daman se apni duniya-dari bandh kar

ruuh ke dāman se apnī duniyā-dārī bāñdh kar

chal rahe haiñ dam-ba-dam āñkhoñ pe paTTī bāñdh kar

ye kahānī ek aise sar-phire mausam kī hai

ḳhushk pattoñ se jo le aayā thā āñdhī bāñdh kar

haq agar koī numū kā thā to vo us ne adā

kar diyā hai bādaloñ se ābyārī bāñdh kar

sub.h hotī hai to kunj-e-ḳhush-gumānī meñ kahīñ

pheñk dī jaatī hai shab bhar kī siyāhī bāñdh kar

ai mire dariyā agar koī bharosa ho tirā

chhoḌ jā.ūñ maiñ tirī lahroñ se kashtī bāñdh kar

gaam uThte hī safar ne paaT dī saarī ḳhalīj

rah-ravī ne Daal dī ik samt duurī bāñdh kar

maiñ sarāsar ek andesha huuñ naqs-e-amn kā

mujh ko rakhtā hai lihāzā merā qaidī bāñdh kar

ijz-goī par paḌāv Daal detī hai mirī

lafz-yābī mānaviyat se hai titlī bāñdh kar

khil rahe haiñ sar-zamīn-e-dil pe jazboñ ke gulāb

uḌ rahī hai aaj ḳhushbū ḳhud se titlī bāñdh kar

jaane siine meñ bikā.ū shai hai kyā jis ke liye

dauḌtī phirtī haiñ sāñseñ rez-gārī bāñdh kar

vā hue hote darīche aaj imkānāt ke

gar na rakh detī hameñ apnī masā.ī bāñdh kar

ruh ke daman se apni duniya-dari bandh kar

chal rahe hain dam-ba-dam aankhon pe paTTi bandh kar

ye kahani ek aise sar-phire mausam ki hai

KHushk patton se jo le aaya tha aandhi bandh kar

haq agar koi numu ka tha to wo us ne ada

kar diya hai baadalon se aabyari bandh kar

subh hoti hai to kunj-e-KHush-gumani mein kahin

phenk di jati hai shab bhar ki siyahi bandh kar

ai mere dariya agar koi bharosa ho tera

chhoD jaun main teri lahron se kashti bandh kar

gam uThte hi safar ne paT di sari KHalij

rah-rawi ne Dal di ek samt duri bandh kar

main sarasar ek andesha hun naqs-e-amn ka

mujh ko rakhta hai lihaza mera qaidi bandh kar

ijz-goi par paDaw Dal deti hai meri

lafz-yabi manawiyat se hai titli bandh kar

khil rahe hain sar-zamin-e-dil pe jazbon ke gulab

uD rahi hai aaj KHushbu KHud se titli bandh kar

jaane sine mein bikau shai hai kya jis ke liye

dauDti phirti hain sansen rez-gari bandh kar

wa hue hote dariche aaj imkanat ke

gar na rakh deti hamein apni masai bandh kar