ruh ke jalte KHarabe ka mudawa bhi nahin

ruuh ke jalte ḳharābe kā mudāvā bhī nahīñ

dard vo bādal hai jo khul kar barastā bhī nahīñ

shahr ke zindāñ ne pahnā diiñ vo zanjīreñ mujhe

merī vahshat ko mayassar dil kā sahrā bhī nahīñ

jis meñ bah jaa.e safīne kī tarah merā vajūd

merī āñkhoñ se ravāñ ġham kā vo dariyā bhī nahīñ

karb kā sūraj sivā neze pe hai Thahrā huā

dil mirā hai barf-zār aisā pighaltā bhī nahīñ

mujh ko yakjā.ī kī hasrat se bhalā kyā vāsta

maiñ to jī bhar kar sar-e-āfāq bikhrā bhī nahīñ

muddatoñ dar par mire vo dastakeñ detā rahā

maiñ magar vo niiñd kā maatā ki chauñkā bhī nahīñ

ruh ke jalte KHarabe ka mudawa bhi nahin

dard wo baadal hai jo khul kar barasta bhi nahin

shahr ke zindan ne pahna din wo zanjiren mujhe

meri wahshat ko mayassar dil ka sahra bhi nahin

jis mein bah jae safine ki tarah mera wajud

meri aankhon se rawan gham ka wo dariya bhi nahin

karb ka suraj siwa neze pe hai Thahra hua

dil mera hai barf-zar aisa pighalta bhi nahin

mujh ko yakjai ki hasrat se bhala kya wasta

main to ji bhar kar sar-e-afaq bikhra bhi nahin

muddaton dar par mere wo dastaken deta raha

main magar wo nind ka mata ki chaunka bhi nahin