روح کی پیاس کو قطرے کا دلاسہ دے دے

روح کی پیاس کو قطرے کا دلاسہ دے دے

میں نے کب تجھ سے کہا ہے مجھے دریا دے دے

لذت درد سے محروم نہ ہو جاؤں کہیں

وقت سے کہنا مجھے پھر کوئی صدقہ دے دے

اب تو اس آئنہ خانے میں بھی دم گھٹتا ہے

میرے مالک مجھے اک دوسرا چہرہ دے دے

زندگی تجھ سے میں کچھ اور نہ مانگوں گی اگر

میرا بچپن مری سکھیاں مری گڑیا دے دے

کھوکھلے رشتوں کی اس بھیڑ میں تنہا ہوں بہت

اب مجھے میرا کوئی چاہنے والا دے دے

شمعؔ خود سے مری پہچان تو کچھ رہ جائے

تو مرے حال کو ماضی کا حوالہ دے دے