ruh ko jagmagane ki koshish na ki zist ghaflat mein sari basar ho gai

ruuh ko jagmagāne kī koshish na kī ziist ġhaflat meñ saarī basar ho ga.ī

raat din ho ga.e sab ke sab rā.egāñ merī hastī kidhar se kidhar ho ga.ī

mujh ko āvāz dete rahe roz-o-shab tere lutf-o-karam meñ ye aa paa.ī kab

tū nahīñ jab milā to huā ye ġhazab har tamannā-e-dil dar-ba-dar ho ga.ī

tujh ko paanā to yārab thā āsāñ bahut tujh ko paane kī koshish hī maiñ ne na kī

zindagī har qadam jaise ik bojh sī merī sāñsoñ kī raftār par ho ga.ī

is kahānī kī koī haqīqat nahīñ zindagānī kī koī haqīqat nahīñ

apne hone se vo bā-ḳhabar ho ga.e tere hone kī jin ko ḳhabar ho ga.ī

lab pe 'nīlam' ke har dam yahī hai duā aise bandoñ meñ rakhnā use bhī sadā

jin pe terī ināyat kā hai silsila terī rahmat kī jin par nazar ho ga.ī

ruh ko jagmagane ki koshish na ki zist ghaflat mein sari basar ho gai

raat din ho gae sab ke sab raegan meri hasti kidhar se kidhar ho gai

mujh ko aawaz dete rahe roz-o-shab tere lutf-o-karam mein ye aa pai kab

tu nahin jab mila to hua ye ghazab har tamanna-e-dil dar-ba-dar ho gai

tujh ko pana to yarab tha aasan bahut tujh ko pane ki koshish hi main ne na ki

zindagi har qadam jaise ek bojh si meri sanson ki raftar par ho gai

is kahani ki koi haqiqat nahin zindagani ki koi haqiqat nahin

apne hone se wo ba-KHabar ho gae tere hone ki jin ko KHabar ho gai

lab pe 'nilam' ke har dam yahi hai dua aise bandon mein rakhna use bhi sada

jin pe teri inayat ka hai silsila teri rahmat ki jin par nazar ho gai