ruh ko qalib ke andar jaanna mushkil hua

ruuh ko qālib ke andar jānñā mushkil huā

lafz meñ ehsās ko pahchānñā mushkil huā

le uḌī patte havā to shāḳh-e-gul be-bas huī

phuul par saa.e kī chādar tānñā mushkil huā

apne ḳhalvat-ḳhāna-e-dil se jo nikle to hameñ

sab ke ġham meñ apnā ġham bhī jānñā mushkil huā

vaqt ne jab aa.ina ham ko dikhāyā ro paḌe

apnī sūrat aap hī pahchānñā mushkil huā

is mashīnī-ahd meñ kyā zaat kyā irfān-e-zāt

aadmī ko aadmī gardānanā mushkil huā

justujū-e-la.al-o-gauhar se bhī baaz aa.e vo log

ḳhirman-e-ḳhāshāk jin se chhānñā mushkil huā

dil na chhoTā kījiye nā-qadrī-e-ahbāb par

aib-jūyoñ ko hunar pahchānñā mushkil huā

kyā kareñ 'jāved' is bahrūpiyoñ ke daur meñ

gul ko gul kāñTe ko kāñTā mānñā mushkil huā

ruh ko qalib ke andar jaanna mushkil hua

lafz mein ehsas ko pahchanna mushkil hua

le uDi patte hawa to shaKH-e-gul be-bas hui

phul par sae ki chadar tanna mushkil hua

apne KHalwat-KHana-e-dil se jo nikle to hamein

sab ke gham mein apna gham bhi jaanna mushkil hua

waqt ne jab aaina hum ko dikhaya ro paDe

apni surat aap hi pahchanna mushkil hua

is mashini-ahd mein kya zat kya irfan-e-zat

aadmi ko aadmi gardanana mushkil hua

justuju-e-lal-o-gauhar se bhi baz aae wo log

KHirman-e-KHashak jin se chhanna mushkil hua

dil na chhoTa kijiye na-qadri-e-ahbab par

aib-juyon ko hunar pahchanna mushkil hua

kya karen 'jawed' is bahrupiyon ke daur mein

gul ko gul kanTe ko kanTa manna mushkil hua