ruh mein jab bhi mahakti hai sada-e-ehsas

ruuh meñ jab bhī mahaktī hai sadā-e-ehsās

lafz-tā-lafz Tapaktī hai sadā-e-ehsās

bār-hā ye bhī huā hai tire saa.e chhū kar

merī rag rag meñ dahaktī hai sadā-e-ehsās

ḳhatm ho jaatā hai jab bhī mire lafzoñ kā safar

mere andar hī bhaTaktī hai sadā-e-ehsās

lāDlī beTī hai zid kartī hai ro detī hai

god meñ jab bhī humaktī hai sadā-e-ehsās

apnī tanhā.ī pe jab mujh ko taras aatā hai

pyaar se mujh ko thapaktī hai sadā-e-ehsās

merī har saañs ko kartī hai suhāgan aksar

chūḌiyāñ ban ke khanaktī hai sadā-e-ehsās

mere andar kisī sūraj kā janam hotā hai

jab bhī jugnū sī chamaktī hai sadā-e-ehsās

tum ko ma.alūm agar ho to batā do mujh ko

kyoñ havāoñ meñ dhaḌaktī hai sadā-e-ehsās

kabhī aahaT kisī ḳhushbū kī mire dil ke qarīb

kabhī sāñsoñ meñ dahaktī hai sadā-e-ehsās

sarsarāte haiñ tirī ḳhushbū ke saa.e jab bhī

shāḳh-e-nāzuk sī lachaktī hai sadā-e-ehsās

rakh liyā naam tirā apne laboñ par maiñ ne

duur se kyoñ mujhe taktī hai sadā-e-ehsās

dhuup ne kaaT liye shahr ke sarsabz shajar

ab kahāñ jā ke chahaktī hai sadā-e-ehsās

chhūne lagtī hai jahāñ ḳhvāboñ kī bārish dil ko

sar se chunarī sī saraktī hai sadā-e-ehsās

baat karte haiñ mire kānoñ se jab bhī jhumke

kaisī chhan-chhan sī chhanaktī hai sadā-e-ehsās

aks paḌtā hai mahaktī huī kaliyoñ kā jahāñ

ta-e-iz.hār chaTaktī hai sadā-e-ehsās

itnā tanhā bhī to chhoḌā nahīñ maiñ ne us ko

ashk chhū chhū ke sisaktī hai sadā-e-ehsās

haath meñ saaz uThātī haiñ havā.eñ jab bhī

kaisī paa.el sī thiraktī hai sadā-e-ehsās

harf-e-iz.hār pe rakhtī huuñ use jab 'ūshā'

merī bindiyā sī damaktī hai sadā-e-ehsās

ruh mein jab bhi mahakti hai sada-e-ehsas

lafz-ta-lafz Tapakti hai sada-e-ehsas

bar-ha ye bhi hua hai tere sae chhu kar

meri rag rag mein dahakti hai sada-e-ehsas

KHatm ho jata hai jab bhi mere lafzon ka safar

mere andar hi bhaTakti hai sada-e-ehsas

laDli beTi hai zid karti hai ro deti hai

god mein jab bhi humakti hai sada-e-ehsas

apni tanhai pe jab mujh ko taras aata hai

pyar se mujh ko thapakti hai sada-e-ehsas

meri har sans ko karti hai suhagan aksar

chuDiyan ban ke khanakti hai sada-e-ehsas

mere andar kisi suraj ka janam hota hai

jab bhi jugnu si chamakti hai sada-e-ehsas

tum ko malum agar ho to bata do mujh ko

kyon hawaon mein dhaDakti hai sada-e-ehsas

kabhi aahaT kisi KHushbu ki mere dil ke qarib

kabhi sanson mein dahakti hai sada-e-ehsas

sarsaraate hain teri KHushbu ke sae jab bhi

shaKH-e-nazuk si lachakti hai sada-e-ehsas

rakh liya nam tera apne labon par main ne

dur se kyon mujhe takti hai sada-e-ehsas

dhup ne kaT liye shahr ke sarsabz shajar

ab kahan ja ke chahakti hai sada-e-ehsas

chhune lagti hai jahan KHwabon ki barish dil ko

sar se chunari si sarakti hai sada-e-ehsas

baat karte hain mere kanon se jab bhi jhumke

kaisi chhan-chhan si chhanakti hai sada-e-ehsas

aks paDta hai mahakti hui kaliyon ka jahan

ta-e-izhaar chaTakti hai sada-e-ehsas

itna tanha bhi to chhoDa nahin main ne us ko

ashk chhu chhu ke sisakti hai sada-e-ehsas

hath mein saz uThati hain hawaen jab bhi

kaisi pael si thirakti hai sada-e-ehsas

harf-e-izhaar pe rakhti hun use jab 'usha'

meri bindiya si damakti hai sada-e-ehsas