ruh mein tazgi nahin qalb mein raushni nahin

ruuh meñ tāzgī nahīñ qalb meñ raushnī nahīñ

terī qasam tire baġhair zindagī zindagī nahīñ

tazkira-e-ḳhudā nahīñ silsila-e-ḳhudī nahīñ

ab maiñ vahāñ huuñ jis jagah mere sivā koī nahīñ

sajda-e-dost ke liye chāhiye jazb-e-be-ḳhudī

bandagī aur ba-qaid-e-hosh kufr hai bandagī nahīñ

sust qadam the mehr-o-māh rah ga.e misl-e-gard-e-rāh

manzil-e-ishq meñ mirā ham-safar ab koī nahīñ

zauq-e-talab hai hāsil-e-husn-e-tamām-e-kā.enāt

tālib-e-dīd bhī to ho javoñ kī kuchh kamī nahīñ

naġhma-e-dil pe jhūmnā pā-e-sanam ko chūmnā

zāhid-e-ḳhushk-tar abhī vāqif-e-bandagī nahīñ

'ārzū' dil ke saath saath hosh-o-ḳhirad bhī phūñk de

ishq meñ ārzū-e-ishq shān-e-qalandarī nahīñ

ruh mein tazgi nahin qalb mein raushni nahin

teri qasam tere baghair zindagi zindagi nahin

tazkira-e-KHuda nahin silsila-e-KHudi nahin

ab main wahan hun jis jagah mere siwa koi nahin

sajda-e-dost ke liye chahiye jazb-e-be-KHudi

bandagi aur ba-qaid-e-hosh kufr hai bandagi nahin

sust qadam the mehr-o-mah rah gae misl-e-gard-e-rah

manzil-e-ishq mein mera ham-safar ab koi nahin

zauq-e-talab hai hasil-e-husn-e-tamam-e-kaenat

talib-e-did bhi to ho jawon ki kuchh kami nahin

naghma-e-dil pe jhumna pa-e-sanam ko chumna

zahid-e-KHushk-tar abhi waqif-e-bandagi nahin

'arzu' dil ke sath sath hosh-o-KHirad bhi phunk de

ishq mein aarzu-e-ishq shan-e-qalandari nahin